Санаи 7 ноябр Вазири кишоварзии Ҷумҳурии Тоҷикистон Сулаймон Зиёзода бо мақсади шиносоӣ аз рафти корҳои ҷамъоварии ҳосили пахта ва коркард он дар корхонаҳои пахтатозакунӣ, фаъолияти гармхонаҳои доимоамалкунанда, ҷамъоварии хӯроки чорво ва омодагӣ ба зимистонгузаронӣ ба ноҳияи Мастчоҳ сафари корӣ анҷом доданд.

         Дар ноҳияи Мастчоҳ Вазири кишоварзӣ Сулаймон Зиёзода, ҳамроҳии иҷрокунандаи вазифаи раиси ноҳия Муллосоқӣ Атовуллозода ва сардори Сарраёсати кишоварзии вилояти Суғд Олимбек Юлдошзода ба хоҷагии деҳқонии Мадинаи ноҳияи Мастчоҳ ташриф оварданд. Дар хоҷагии мазкур гармхонаҳои муосири типи хитоӣ ба майдони 1 гектар бунёд карда шуда, дар майдони 0,40 гектар лимӯ ва 0,60 гектар помидор парвариш карда мешаванд. Зимни сӯҳбат Вазири кишоварзӣ Сулаймон Зиёзода ба масъулон ва хоҷагидорон барои боз ҳам беҳтар ба роҳ мондани фаъолият ва дар ҳама фасли сол барои таъмини бозорҳо бо маҳсулотҳои талаботи рӯз ва иҷрои саривақтии яке аз ҳадафҳои стратегии мамлакат таъмини амнияти озуқаворӣ дастуру супоришҳои мушаххас доданд.

         Ҳамзамон бо мақсади шиносоӣ ба корхонаи пахтатозакунии Ҷамъияти дорои масъулияташ маҳдуди "Музаффар Ко" ташриф оварданд.

         Мавриди зикр аст, ки дар ноҳияи Мастчоҳи вилояти Суғд деҳқонон дар соли 2021 ба майдони 8890 гектар пахта кишт намуда, то имрӯз тибқи маълумоти оморӣ ба ҳолати 5 ноябр 19143 тонна пахта ҷамъоварӣ кардаанд, ки 66,9 фоизи дурнамои нақшаро ташкил медиҳад.

Шуъбаи матбуот ва иттилоот