Санаи 4-уми декабри соли 2024 дар шаҳри Дубайи Амороти Муттаҳидаи Араб Намоишгоҳи байналмилалии «WORLDEF-Dubai 2024» оғоз гардид, ки дар он Вазири кишоварзии Ҷумҳурии Тоҷикистон Ҳакимзода Қурбон иштирок намуд.

      Дар намоишгоҳ ҳайати Тоҷикистон, роҳбарони ширкатҳо ва соҳибкорони ватанӣ иштирок дошта, Павилиони миллии Тоҷикистон ташкил шудааст. 

            Дар павилион беш аз 300 намуд маҳсулоти саноатию кишоварзии ватанӣ пешниҳод мегардад.

      Намоишгоҳи байналмилалии «WORLDEF-Dubai 2024» майдони сатҳи ҷаҳонӣ ба ҳисоб рафта, ҳамасола дар он беш аз 5000 ширкати байналмилалӣ аз давлатҳои гуногун иштирок намуда, он ду рӯз идома меёбад.

          Бояд қайд намуд, ки Ҷумҳурии Тоҷикистон то имрӯз бо зиёда аз 100 давлати мухталифи ҷаҳон робитаи савдои хориҷӣ дошта, дар баробари ин 500 намуд маҳсулоти саноатӣ ва кишоварзии ватаниро ба зиёда аз 50 давлати ҷаҳон содирот менамояд.

        Шуъбаи матбуот ва иттилоот